Geguritan

Jamane Komputer

Jamane wis serba komputer

akeh wong padha keblinger

rodha becakmu tetep munyer

sarapan sega pecel

jamana wis serba mall

uripmu panggah nguler kembang

gethuk tela pendhak rina

jamane wis serba  supermarket

ing desamu pasar pendhak kliwon

dol tinuku nyang-nyangan kaya padudon

golek bati sarepis adus kringet

jamane wis serba satelit

pacul arit panggah nggegurit

nggo ngrabuki jagad alit

jamane wis serba edan

lanang ilang jalere
wadon ilang wanitane

Jaman Saiki

Kerlap-kerlip lampu neon

Ing satengahe gedhong-gedhong dhuwur

Tan gawe sliramu kedhep

Dandanan moncer

Klambi arupa jubah

Ora gawe awakmu isin

Lumaku saben dina ing kana

Jarene uwis jamane,

Jarene uwis dadi modene

Kanggo nyukupi hawa nepsu

Lali marang sejatine awak

Slendhangmu namung kanggo penutup awak

Dudu ati, lan pikiranmu

Pancen jamane wis beda

Mall-mall didadekake omah

Mesjid-mesjid namung kanggo ampiran

Al-quran dadi pajangan

Urip wis adoh marang kabegjan

Ning cedhak marang kanisthan